يا أكرم المعطين

كلي اذنوب صاير ..
والخطايا اهواي
من ياهي استغفر
واطلب التوبه ؟؟؟
اذا وي البشر ..
ما الگه رحمه وخير
لأن ياهو الافزعه
اتبين اعيوبه !!
اللهم الك
جبت الگلب خجلان
يم رحمتك رايد
انزع اذنوبه
ماحاجه الحچي ..
وانت ادره ما بالكون
وكل اعمالي يمك
هي محسوبه
الوادم لو تصوم
شهور يابو شهور
تبقى لرحمتك
ياربي مطلوبه
الهي انطيتنا
وانت اكرم المعطين
وهاي الدنيا سفره ،
ايامها ألعوبه
نتطاول وتغفر ..
صلفه هاي الناس ..!!
ولو غيرك ابلحظه
ايسوي اعجوبه
الهي ابحق محمد
واهل هذا البيت
تمحي اذنوبنه
البالسجل مكتوبه
ثوب الله رحمة ،
وعافية ، وغفران
وهنياله اليحصل
لمسه من ثوبه

الشاعر محمد رحيمة الطائي