ظلم فرعون

مات الشوگ بيه
وماتت اللهفه
ومو ذاك آنه الاول ..
مثل متعرفه
تغير حتى گلبي ..
مو مثل ماچان
وكل دگات گلبي اليوم
مختلفه
هواي اجروح بيه
وبلكي من انساك
ترتاح الجروح ..
وبالعجل تشفه
هاي انت الردتها
اتواكحت وياي ..
وقابلت الحنان
ابروحك الصلفه
چنت شمعه آنه الك
وسنيني محترگات
خذتني النار ..
گلي ابيا وكت أطفه ؟؟
تذكر من عطشت
أعيوني صارت غيم ؟؟
گمت امطر وأزخ حالوب
ع الشفه
وتذكر من بچيت اگبالي ..
گتلك لا .......
ذب همك عليَّ
وابقى اضحك دوم
اخاف الهم يغير روحك الترفه
شمسح من ذنوبك ..
گلي حتى ارتاح ..
انترس گلبي ابهمومك
ياهو الينظفه ؟؟
چنت ظالم وياي ..
لحد ظلم فرعون
بس تتظاهر انت
ابطيبه وبعفه
حافي اعله الجمر ..
چنت امشي آنه وياك
وياهو العالجمر .. للغير يتحفه ..؟؟
وتريد انسه اللي صار ..
واضحك آنه وياك ؟؟
وحسابي الطويل وياك ..
مايصفه
اذا اضحك چذب
بس داخلي تنور
ومن احچي العليه ..
انوب تتشفه
اكو غيري اليسعدك
كافي مو مليت ..
چمدوب اعله ظيمه
الگلب يتخفه
بچيت اشگد عليك ..
وحملت الهموم
جود الصبر بيدي
وسهمك ايزرفه
هسه ابيا وجه
نتقابل اني وياك
كل اللي جرالي ..
اتگلي ماكفه !!؟؟
الشاعر محمد رحيمة الطائي