الطيور المهاجره

Sunday, November 12, 2006

( حزام ناسف )

تدري شنهو حزام ناسف ؟؟
راح أحجيلك وعرف
حجي جد ينكط عواطف
مو حجي لواحد امريح
صيفه يكضي بالمصايف !!
حجي واحد شاف ضيم
وربته دروس الصرايف
راح احجيلك طريفه
او وجهي بي كومة طرايف
مرّه جنت بسوك أمشي
وشايل ابأيدي رغيف
وراجع البيتي او أسرتي
وبيهه جان الفصل صيف
او ما أحس اللانه طاير
بالسمه وفوك المناير
ردت بس المح حمامه
الحمام البيهه هاجر..
....
شفت خارطة العراق
مكسره بمعول جبان
شفت نخله دموع تبجي
توسدت مر الزمان
شفت ذيب الطائفيه
ينهش بشاة الامان..
...
شفت ناس تشيل ناس
وشفت عين وشفت راس
وشفت ضحكة طفل ميت
يلعب برمشه النعاس
وشفت شيبة رجل شايب
شربت امن الموت كاس
وشفت قطعه بلون أسود
والعباره تكول ينعى
والأشد مو قطعه وحده
ابين قطعه وقطعه قطعه
وشفت جاري وشفت نعشه
وشيله وعكال التودعه..
...
هاذه دم أبن العراق
او بالمزاد انباع سلعه
الله وكبر يا ألاهي
نركض او حصتنه وجعه ..
...
ليش مو هاذه العراق
الجان بيه تلوذ ربعه
وجان ديوان الأحبه
وجان كهوه وجان ربعه
وجان من يصرخ بصوته ..
يهتز الكون او يسمعه
وجان للمهموم ضحكه
او مايهل للضيج دمعه
وجان ملكه وحضن دافي
وجان للطيبات سمعه
وجان للجوعان خبزه
وجان ملبس جان مرعه
وجان لو ظلم العالم
تلكه وسط ارفوفه شمعه
وجان لو غيم العالم
ينفذ امن الغيم لمعه
وجان لو ضاكت الدنيه
بكاع صبره الدنيه وسعه ..
...
هسه هدمنه المفخخ
حته باب البيت خايف !!
والفرح شايل مسدس
كض خفاره أعله الشفايف
حته شرفات المنازل
يا أخي الانسان شايف ؟؟
هاجر السندان منهه
وشفته بطريبيل واكف
عاف دجله ومي فراته
وريكه بالحسرات ناشف !!
..
ليش مو خير العراق
الفتّح اقفال المصارف
انعش اسهم فر مكاين
سوّه بالعالم سوالف
حرك أسواق الكساد
بكاك نفطه الروجه جارف
ليش حصتك دمع خويه ؟؟
والجرح للدوم نازف
ليش حصتك ياعراقي
الموت مطبوخ أعله ناسف ؟؟



ليش ؟؟؟!!!!.



احسان العيد

0 Comments:

Post a Comment

Subscribe to Post Comments [Atom]

<< Home