ألمن جاي؟

كونك جاي..
من اول امس ماجان ضاع اصباي
وماجان الثلج يستفحل اعله الراس
ويفتح ع الوجه يوميه مجرى الماي
كونك جاي...
من جان الجدم يتشلبه فوك الريح
مو هسه اعله ظلي اتعثر أبممشاي
كونك جاي...
من جان الخلك من كد بياض البيك
ويستوعب غرورك لو كصيت وياي
كونك جاي...
من جان الموادع دمعه تخنك صوت...
موش اوداع غربه وينتهي ابيباي
ألمن جاي؟
مابي حيل حسنك والحلات البيك
العمر كاغد جكاره ابداعتك بهداي
تدري العمر كصبه ويبست من اسنين
بس تدري الكصب من حزنه صنعوا ناي
يلواكف اكبالي بلامسافة خوف...
وبساتينك ثمرهه ابمرمى هاي وهاي
اشوفن صحن حضنك بيه ألذ الزاد..
وتدري ابجوع اديه وحسرتي وشكواي
تفوح اباب صدرك دنيه من الطيب...
وتطالبني الهدوء اشلون ترهم هاي؟
صح النهر ناشف بس نشف مودوم
من تحفر شبر تطلع اعيون الماي
لاتنكث جذع بس ضال بيه عنكود...
اخافن من تهزه ايطيح آخر راي
عارف مأمون العبدالله